متتمناش
غير اللي تطوله باسنانك
لأن اللي وصل ايدك
متضمنشي يكون مسموح
تبقى في دمك و متقسملكش
تاخدها نموسة هوا وتروح
متستناش
غير اللي تضمنه ييجي
ضمان الروح
متتوقّعش من نَّفسَك
معاك بلورة سحرية؟
معاك جِنِّي؟!
يكش تلاقي سكة جَنّة مفروشة
بكل مفاتن الدنيا
اوعى تروح
اياك تِتقَوَّى باللي معاك
صيني يا بِيه
بيبْرق بس من برّاه
فالصو الأصل
اسمع مني
اوعى تروح
امشي فـ نفس سِكّة ابوك
عمركش شوفت ديك بيعوم؟
بتتمنّى ليه؟
وبتمنّي غيرك بيك يقوم؟
عايز نِكمل؟
نفضل نتساقى سموم؟
الرحمة حلوة مفيش كلام
ممكن نصوم
احنا يدوب
نلحق نصلح في الكسور
يمكن نعدّي مالغيوم
هنزعل؟!
طبيعي وايه يعني
فيه ايه في الدنيا يرضينا؟!
هتنزل من عنينا سيول؟
غسول
لازمن نستمر عليه
٣ مرات .. ينسينا
خليك لواحدك لمّا تبكي
في مكان خالي ومتداري
لا حد يشوفك فتتصالح
ولا يواسيك
ولا يهون عليك الأمر
ولو حصلت ارجع للصور تاني
لحلم العمر
لخطوة بخطوة مشيت فيها وعديتها
لكل مصيبة حليتها
لكل لحظة تسهرها ومتنامهاش
لكل اللي دفعته غم وراح ببلاش
متندمشي
اكيد كان خير
ولسه الخير هنا ممشاش
انا الفالصو ..
من ساسي لراسي غالطانه
ولسة عندي نفس الحلم
لسه روح الأمل مطلعش
لسة القلب خساية
ولسه روحي في بابايا
لسه حاجات اعيش ليها
وحاجاتك لسة ويايا
متتمناش ..
مفيش امنية هتجيلك
هتسرح بيك وهتسيبك
خطاوينا اللي هتودينا للسكة
يا نلقى الزاد .. يا إما نجوع
وكوني ضعيفة مش مالكةٌ
فانا اسفة
أنا مسافرة كمان اسبوع
زينب عيد
4/6/2014
